「唔鍾意就換過第二個啦！」講緊既係你地每日都用緊既家電傢俬🛋當係購買同拋棄都咁方便既世代，你可能會因為張梳化張茶几唔襯你屋企既設計所以唔要、部風扇唔夠大風所以要換過部...依種消費文化直接造成堆填區既負擔，根據2019年環保署既「香港固體廢物監察報告」，2018年家具及家電用品等體積龐大既廢物加上雜類廢物，佔家居廢物接近一成！我地成日都講環保，除咗藍黃啡綠回收之外，仲有啲咩我地都可以回收下？ Doncaster Refurnish正正就係回收家電傢俬既公司。佢係一間位於英國由2003年開業至今嘅家品店，成立目的係為咗防止能夠正常使用嘅家俬被當成廢物，佢地會四出回收一啲家俬電器，並將佢地修理好，再以合理嘅價錢售賣俾當地嘅居民。 “Don’t dump it, donate it!” Doncaster Refurnish會將他人捐出嚟既傢俬放到社交平台，以二手寄賣店形式營運🖥至今已經收集超過74000件傢俬、33000件電器，而當中接近10000戶家庭受惠。係英國，無論你想以低廉價錢去換傢俬、以環保為念去重用傢俬、或者想丟棄傢俬，都可以去搵佢地！ 除咗保護環境之外，Doncaster Refurnish亦都以人為本，會聘請有特殊需要或者係長期失業人士，為佢地提供訓練同工作機會，令佢地可以喺到獲得自信心，經驗同埋技能。Doncaster Refurnish仲因為咁而贏咗2010年頓卡斯特「最佳僱主」既獎項！ 大家都可以學習Doncaster Refurnish，唔要傢俬之前再諗一諗，嘗試修理或者改造佢地，自己可以慳一筆錢之餘又唔會造成浪費。如果想轉售、捐贈家品比慈善機構或者有需要人士，香港亦有提供「二手傢俱回收服務」既公司，大部分亦有免費上門回收服務，唔好因為麻煩而直接揼咗有用既家電傢俬吖！
香港「二手傢具回收」例子： 家點綠：收集二手傢俬，經翻新後繼續被有效地使用；定期捐贈二手傢俬給香港的弱勢社群家庭
https://www.green-dot-home.com.hk/startup.html 木一番：收集木材來做家具，結合本地設計師的設計，提供訂製傢俬服務，從設計、生產到安裝一手包辦
https://www.woodrite.com.hk/ 國際十字路會：將物資向香港和世界各地有需要的人士派發，包括社會福利署和其他慈善機構轉介的個案
https://www.crossroads.org.hk/zh-hant/ 曙光計劃：搬運、搬屋、存倉及回收傢俬一條龍服務；提供傢俬轉贈服務幫助貧困的家庭
