• SEnSE

廢氣造的墨水 - Air-Ink

「我當時就諗,如果我地可以回收空氣污染物,可唔可能將佢地變成好似墨水咁嘅顏料呢?」


城市發展隨之帶來既空氣污染人人討厭;除咗減碳排放,已經出現咗既污染物又要點算好?Sharma,一位印度工程師,因為啲衫褲比汽車排放嘅廢氣整到污糟哂,於是就諗咗一個好有創意嘅解決方法:將汽車廢氣轉變成墨水Air-Ink!


Sharma 創立Graviky Labs,用三年時間研發排氣過濾器 KAALINK,過濾器可以捕捉 95% 由發電機、渡輪、車子所產生嘅碳煙,將污染物質轉變成為顏料。只需要安裝過濾器喺汽車或者飛機引擎嘅排氣管,就可以將空氣轉換成有用嘅物質,一般市民都可以安裝!


將有害污染物同粉塵隔開之後,淨低嘅就係含有碳嘅顆粒,磨研成粉末之後就可以混合油同其他溶液,因應唔同需求製成各類嘅墨水,例如畫畫、書寫甚至係可以列印用。


不過因為提煉過程有高致癌風險,所以製成品嘅價格都好高:一枝以空氣墨水製成嘅 2mm 筆尖油性筆大概要 25 美金,同時提醒緊我地:污染地球,代價不菲。


Sharma 後嚟都去咗好多空氣汙染嚴重嘅城市旅行,挑戰 19 位街頭藝術家,用 Air-Ink 創作藝術作品,將「廢氣都可以變藝術」嘅概念,傳播到更多嘅地方。