• SEnSE

存放自由的圖書館 @ Minecraft

唔知大家有冇玩過Minecraft(創世神)呢? Minecraft係一款沙盒式建造遊戲,玩家喺一個由虛擬立方體組成嘅地方,任意建造或者破壞方塊,去打造玩家心目中的理想世界。遊戲活動包括採集礦石、同敵對生物戰鬥、合成新方塊同收集各種資源等等。遊戲的無限制模式讓玩家自由創造建築物、作品與藝術創作。


而喺3月12號「世界反網路審查日」,「不受審查圖書館」(The Uncensored Library) 就喺Minecraft誕生!「不受審查圖書館」係由 Minecraft設計師團隊BlockWorks同無國界記者組織合作,聚集全球嚟自 16 個國家 24 位頂尖創世神,耗費超過 250 個鐘,利用1,250 萬多塊方塊成功建造出主建築近 300 米長的虛擬圖書館。


佢地深知並唔係全世界都享有言論自由,喺某啲極權國家,記者同民眾嘅言論都會被政府審查封鎖,而「無國界記者」為咗致力保護言論同新聞自由,特別同BlockWorks 合作,將各國遭到審查封鎖嘅新聞存放喺呢間虛擬圖書館入面。


虛擬圖書館主要分為 6 個區域,主要存放嚟自沙地阿拉伯🇸🇦、俄羅斯🇷🇺、墨西哥🇲🇽、埃及🇪🇬與越南🇻🇳等 5 個國家嘅記者同新聞資料,呢啲都係喺當地遭到審查而被封鎖嘅資訊,當中更有記者因而入獄、流放、甚至遭到殺害。


玩家可以喺圖書館直接透過平台傳送到各個區域,透過點擊書本嚟觀看被下架嘅新聞資訊。而新聞資料亦有英文版本提供,希望可以比更多嘅人閱讀,亦可以喺圖書館聽記者嘅語音檔(原文)。


身處喺香港,可能你會覺得言論審查離我地好遠,但事實上言論審查幾乎無處不在,只係形式上有唔同。喺到處都有限制甚至壓迫嘅社會,有一款遊戲可以令玩家喺一個世界入面隨心所慾,雖然只係虛擬形式,但卻守護住每個人渴望嘅自由心。